كلّه منّي لـنت لين الليـن لك قسّاك

لو عطيتك عمري كله ما شريت رضاك

مهـما جيـتك صح  لازم أرجع الغلطان

مـاني قـادر حـتى ألقـى نص حل ويّاك

ما بقت لي كلمة حلوة إلا صباح الخير

وبعدها العتاب يبـدي وأبـتدي التبرير

وأتسابق ويّـا زعلِك من يعدّي اليـوم

وراحت أيّـامي أحــاول أثبت إنـي غـير

العلاقة دوري فيها بسّ أسوّي اللي تبـيه ..

شكلي بقلبك  ولكن بالحقيقة ماني فيه ..

أصغر أغلاطي بحقّك عندك أكبر من غلاي !

وأكبر أغلاطك بحقّي لنّ أحبك ما عليه ..

مهما أحط الكون بِعْيونك بِيبقـى فيها زود ! ..

إنت مـو جاحد طبيعي إنت مبدع بالجحود ..

صعبة أحبك قد مَاتحب نفسك وتعشق أناك ..

صبري لـه حد ونهاية وإنت أنـاني بلا حدود …

لأجل أشوف بعيني لازم مـنّهـا تنشال ..،

وبـالـــي بـيرتاح لـمّا مـا تـمر عالبـال …

مـا بقـى عندي تنازل بس نِزَلْت لوين !!

وإنته مَا يبيّن بِعينك شيْ بِكل الأحوال ..

ليه أضيّع باقـي عمري في سبيل إنسان

مـا يحـسْ بالراحـة إلا إنْ شـافني تعبان

آنـا أوْلى فيـني منّك دام ما بـــك خيـر

رابِـحك خاسر وربّـــي وخاسرك ربحان

من كثر تهديدك في بعدك على بعدك قويت …

ودام طيبي ماهو نافع وش يضرني لا قسيت ؟! ..

ضامن وْجودي بطريقة حسستني ب إنعدام !!

ناسي إنّـي لـي كرامــة وأقدر أرحل لا بغيـت !

إي نعم هالمـرة آنا اللي بغـيب وما أبيك ..

مــا أخـذته من حـياتي كافي وزايد عليك ..

الشـعور اللي تسبب فــي تمـاديك بيموت …

ورني أقوى فراق عندك وإحلم إني راح أجيك …